પાટણના પ્રખ્યાત સંગીતકાર, ગાયક સંદિપ ખત્રી, અનિતા ખત્રીના સ્વર સંદિપ મ્યુઝિકલ કલબ પરિવાર દ્વારા રફી-કિશોર-મુકેશ સંગીત સપ્તાહનો ગઇકાલે રાત્રે કાળકા માતા મંદિરના પ્રાગણમાં પ્રારંભ કરવામાં આવ્યો હતો. સુરોની સફરનું આ પાંચમું વર્ષ છે.
મહાકાળી માતાના ઉપાસક, સાહિત્યકાર અશોકભાઇ વ્યાસના મુખ્ય મહેમાન અને આર્શિવાદ સાથે આ સંગીતના અનોખા સપ્તાહનો પ્રારંભ મહાકાળી માતા સમક્ષ દીપ પ્રકટાવી અને સંદિપ ખત્રીના પ્રાર્થના ગીત સાથે થયેલ. આ પ્રસંગે અતિથિ વિશેષ તરીકે શ્રી કાનજીભાઇ પટેલ, હર્ષદભાઇ ખમાર, મહાસુખભાઇ મોદી, દીપક ખત્રી હતા. આ પ્રસંગે સંદિપ ખત્રીના કુશળ સંચાલન નીચે તૈયાર થયેલ કલાકારોએ રફી, મુકેશ, કિશોર, લત્તા, આશા ભોંસલેના સ્વરે ગાયેલા ગીતો પ્રસ્તુત કરેલ.
તા. ૧૯-૭-૨૦૨૬થી તા. ૨-૮-૨૦૨૬ સુધી ચાલનારી આ સંગીત સપ્તાહ યાત્રામાં પાટણના ચૌરેચોટે, ચાર રસ્તે, જુદા જુદા હોલ સભાગૃહમાં ૨૫ જેટલા કાર્યક્રમો દ્વારા ૫૦ જેટલા કલાકારો ૫૦૦ જેટલા ગીતો ગાઇને ધુમ મચાવશે. આ ઉપરાંત તા. ૨-૮-૨૦૨૬ના રોજ યુનિવર્સિટીના રંગભવનમાં સવારે ૮ થી રાત્રીના ૧૧ સુધી નોન સ્ટોપ પાટણના ઇતિહાસમાં પહેલીવાર ૧૨૫ ગીતોનો કાર્યક્રમ યોજાશે. આજના પ્રથમ કાર્યક્રમનું સુંદર સંચાલન આત્મારામભાઇ નાયી અને જ્યોતીકાબેન પટેલે કર્યું હતું. 
